Am Beräich vun den Impfunge gëtt de Lëtzebuerger Gesondheetsministère eng Rei vu Recommandatiounen eraus, déi „d’Kanner an déi Erwuesse viru geféierlechen oder esouguer déidleche Krankheete schütze sollen“. Impfungen, esou preziséieren d’Autoritéiten, „sinn e feste Bestanddeel vun de Preventiounsmesuren, déi Iech an Äre Kanner e gesond Liewen erméiglechen“.
Dësen Artikel gouf opgrond vun den offiziellen Recommandatioune vun de lëtzebuergeschen Gesondheetsautoritéiten verfaasst.
Keng Flicht, awer eng staark Recommandatioun
Zu Lëtzebuerg sinn d’Impfungen zwar net obligatoresch, si ginn awer vum Ministère fir Gesondheet a sozial Sécherheet staark recommandéiert. Reegelméisseg ginn am ganze Land Messagen a Campagnen diffuséiert, fir d’Bevëlkerung fir d’Theema Impfungen ze sensibiliséieren. De Conseil supérieur des maladies infectieuses (CSMI) diktéiert hei d’Recommandatioune fir d’Impfungen. D’Direction de la santé setzt déi am Kader vun engem Impfkalenner ëm.
Déi sougenannt Krankheeten „à prévention vaccinale” sinn déi, déi duerch eng Impfung kënne verhënnert ginn. De Ministère fir Gesondheet a sozial Sécherheet réit deemno, sech a verschiddenen Abschnitter vun eisem Liewen an no engem festgeluechte Kalenner géint dës Krankheeten impfen ze loossen.
D’Impfung vu Bëbeeën: tëschent 0 an 23 Méint
| Wien ass betraff? | Wéi eng Impfunge géint wéi eng Krankheeten? | A wéi engem Alter soll ee sech am beschten impfe loossen? | Wéi eng Follgen hunn déi jeeweileg Krankheeten? |
|---|---|---|---|
| Neigebuere Kanner | Immuniséierung géint den RSV (VRS op Franséisch), wann d’Mamm net wärend hirer Schwangerschaft geimpft gouf | Am beschte virum Verloosse vun der Maternité | De Respiratoresche Synzytial-Virus léist d’Bronchiolite aus, eng Infektiounskrankheet vun den Otemweeër, déi ganz dacks bei de Puppelcher ënner zwee Joer virkënnt an dozou féiere kann, datt d’Kand hospitaliséiert muss ginn. |
| Puppelcher | Kombinatiounsimpfstoff: 1. Dosis: Diphtherie, Tetanus, Coqueluche (Bloen Houscht), invasiv Infektiounen duerch Haemophilus Influenzae Typ B, Kinderlämung, Hepatitt B | Vun 2 Méint un | D’Diphtherie gräift d’Otemweeër un a kann zu Otemnout an Erstécke féieren. Den Tetanus féiert zu Muskelkontraktiounen, déi dacks déidlech sinn. Invasiv Infektiounen duerch Haemophilus Influenzae Typ B verursaachen Hirnhautentzündungen, Kehldeckelentzündungen an Arthritt. D’Kinderlämung (och ënnert dem Numm „Polio” bekannt) féiert zu Duerchfall a schwéieren, dauerhafte Lämungen. D’Hepatitt B féiert zu enger Infektioun vun der Liewer a kann eng chronesch Hepatitt ausléisen. |
| Rotavirus: 1. Dosis | De Rotavirus kann eng uerg Gastroenteritis ausléisen. | ||
| Pneumokokken: 1. Dosis | Invasiv Pneumokokkeninfektioune verursaache bakteriell Hirnhautentzündungen a Bluttinfektioune mat potenziell déidleche Follgen. | ||
| Rotavirus: 2. Dosis, Meningokokke B: 1. Dosis | Vun 3 Méint un | Meningokokke verursaache ganz schwéier Infektiounen ewéi Hirnhautentzündungen a Bluttvergëftungen. | |
| Kombinatiounsimpfstoff: 2. Dosis | Vu 4 Méint un | ||
| Pneumokokken: 2. Dosis | |||
| Rotavirus: 3. Dosis | |||
| Meningokokke B: 2. Dosis | Vu 5 Méint un | ||
| Jonk Kanner | Kombinatiounsimpfstoff: 3. Dosis, Pneumokokken: 3. Dosis | Vun 11 Méint un | |
| RMRW-Impfstoff (op Franséisch „RORV“): 1. Dosis: Riedelen, Mumps, Riselen, Waasserpouken | Vun 12 Méint un | D’Riedele sinn eng ganz ustiechend Krankheet; bei Komplikatioune kann et zu irreversibele Gehierschied kommen oder esouguer zum Doud. Mumps verursaacht eng Entzündung vun de Speicheldrüsen a kann zu schwéiere Komplikatioune féieren (Hirnhautentzündung, Dafheet). D’Risele sinn extreem geféierlech fir schwanger Fraen. De Virus iwwerdréit sech op de Fötus, verursaacht Feelbildungen a ka souguer zum Doud in utero féieren. D’Waasserpouke kënnen zu eeschte Komplikatioune féieren, besonnesch bei schwangere Fraen a bei neigebuere Kanner. | |
| Meningokokke B: 3. Dosis | |||
| Meningokokken ACWY: 1. Dosis | Vun 13 Méint un | Meningokokke verursaache ganz schwéier Infektiounen ewéi Hirnhautentzündungen a Bluttvergëftungen. | |
| RMRW-Impfstoff: 2. Dosis: Riedelen, Mumps, Riselen, Waasserpouken | Vu 15 bis 23 Méint |
Impfunge bei Kanner a Jugendlechen am Alter vu 5 bis 20 Joer
| Wien ass betraff? | Wéi eng Impfunge géint wéi eng Krankheeten? | A wéi engem Alter soll ee sech am beschten impfe loossen? | Wéi eng Follgen hunn déi jeeweileg Krankheeten? |
|---|---|---|---|
| Kleng Kanner | Kombinatiounsimpfstoff: Rappel | Tëschent 5 a 6 Joer | |
| Rattrapage Pneumokokken: wa bis dohin nach net dogéint geimpft | |||
| Grouss Kanner | Rattrapage Hepatitt B: ëm den Alter vun 12 Joer, wa bis dohin nach net dogéint geimpft | Tëschent 9 a 14 Joer | |
| Humane Papillomavirus (HPV): 2 Dosissen, ëm den Alter vun 12 Joer | Eng Infektioun mam humane Papillomavirus kann, a verschiddene Fäll, schwéier Komplikatiounen, wéi z. B. Kriibs, ervirruffen. | ||
| Jugendlecher | Kombinatiounsimpfstoff: Rappel, ëm den Alter vu 15-16 Joer | Tëschent 15 a 20 Joer | |
| Meningokokken ACWY: Rappel, ëm den Alter vu 15-16 Joer | |||
| Rattrapage humane Papillomavirus (HPV): 2 Dosissen, wa bis dohin nach net dogéint geimpft, ëm den Alter vu 15-20 Joer |
Impfung vun Erwuessenen
Et kann ee sech an all Alter impfe loossen, et ass ni ze spéit.
Allgemeng Rappeller:
Bei den Erwuessene gëtt recommandéiert, all zéng Joer e Rappel mam Kombinatiounsimpfstoff ze maachen, dee géint d’Diphtherie, den Tetanus, de Mumps an d’Kinderlämung schützt. Och wann dës Krankheeten zum Deel net méi virkommen, ass et wichteg, weider ze impfen, well se soss ganz séier nees opdauchen a Schued uriichte kéinten, besonnesch bei deene méi vulnerabele Bevëlkerungsgruppen.
Erwuessenen, déi no 1980 gebuer goufen a keng 2 Dosisse vum Kombinatiounsimpfstoff géint Riedelen-Mumps-Risele kruten, gëtt e Rappel recommandéiert.
Persounen iwwer 65 Joer:
Persounen iwwer 65 Joer recommandéiert de Ministère fir Gesondheet a sozial Sécherheet eng Impfung géint:
- invasiv Infektioune mat Pneumokokken
- d’Gürtelrous
Personnes immunodéprimées et à risques :
Les personnes de plus de 18 ans qui sont immunodéprimées à cause d’une maladie ou d’un traitement sont invitées à se faire vacciner contre le zona.
Immungeschwächt a Risikopersounen:
- laPersounen iwwer 18 Joer, déi opgrond vun enger Krankheet oder enger Behandlung immungeschwächt sinn, solle sech géint d’Gürtelrous impfe loossen.
- Schwangere Frae recommandéiert d’Regierung déi follgend Impfungen:
- géint d’saisonal Gripp, am Wanter, egal a wéi engem Stadium vun der Schwangerschaft
- géint Mumps, am 2. oder 3. Trimester
- géint RSV, wann déi schwanger Fra gesond ass, tëschent der 32. an der 36. Schwangerschaftswoch
- géint Covid-19
Persounen iwwer 65 Joer an all Risikopersoune solle sech all Joer géint déi saisonal Gripp impfe loossen.
Dir hutt eng Rees geplangt?
Wann Dir eng wäit Rees plangt, ass et wichteg, datt Dir Iechmindestens 6 Wochen am Viraus gutt informéiert, wéi eng Impfungen néideg sinn oder wéi eng Rappeller Dir maache musst. D’Infektiounstauxe sinn effektiv an deene verschiddene Regioune vun der Welt ganz ënnerschiddlech.
Allgemeng ginn awer Impfunge recommandéiert géint: Tetanus, Diphtherie, Hepatitt A an d’ Riedelen. Jee no Destinatioun kritt Dir ausserdeem geroden, Iech géint Cholera, déi japanesch Enzephalitis, Typhus asw. impfen ze loossen.
Fir méi gewuer ze ginn, recommandéiert de Ministère fir Gesondheet a sozial Sécherheet de Leit, déi verreesen, laang genuch am Viraus e Rendez-vous an der Travel Clinic vum Centre Hospitalier de Luxembourg (CHL) auszemaachen.
Keng Käschte fir verschidde Vaccinen
D’Impfstoffer aus dem Lëtzebuerger nationalen Impfprogramm ginn den Impfdoktere vum Staat gratis zur Verfügung gestallt. Hei mussen d’Patienten nëmmen d’Käschte fir d’Consultatioun beim Dokter droen.
Verschidden Impfunge gi ganz vun der CNS (National Krankekeess) iwwerholl. Dat gëllt fir:
- d’saisonal Gripp: fir Persoune vu 65 Joer a méi a fir aner Zilgruppen
- invasiv Infektiounen duerch Pneumokokken: fir gesond Persounen am Alter vu 65 bis 85 Joer a fir aner Zilgruppen
- den humane Papillomavirus: fir Persounen am Alter vun 9 bis 21 Joer nach mat a fir immungeschwächt Persounen
Den elektroneschen Impfpass, fir e vereinfachte Suivi vun den Impfungen
Wann Dir zu Lëtzebuerg verséchert sidd, ass den elektroneschen Impfpass (carnet de vaccination électronique - CVE) vun der Agence eSanté en digitaalt Instrument, dat et erlaabt, all d’Informatiounen am Zesummenhang mat Ärem Impfhistorique ze zentraliséieren. E gëtt, mat Ärem Accord, vun Ärem Impfdokter ugeluecht an ausgefëllt. En ersetzt déi fréier giel Impfkaart, déi den Ament awer nach gülteg bleift.
Wousst Dir dat?
Deen éischten Impfstoff gouf am 18. Joerhonnert vum Edward Jenner, engem engleschen Dokter, entdeckt. Hien huet deemools beobacht, datt Persoune mat enger Erkrankung, déi vun de Kéi iwwerdroe gouf an déi de Pouke ganz änlech war, anscheinend immun géint d’Pouke waren. Enges Daags am Joer 1796 huet hien decidéiert, dës Krankheet bewosst op e klenge Jong ze iwwerdroen, an en e puer Woche méi spéit mam Poukevirus ze infizéieren. D’Kand huet déi Krankheet net erwëscht. An esou war d’„Vaccinatioun” oder d’Impfung gebuer, där hiren Numm vun de „variolae vaccinae”, de Koupouken, ofgeleet ass.
No e puer Joerhonnerten Experimentatiounen a Fuerschungen huet Weltgesondheetsorganisatioun (OMS) an den 1960er Joren e weltwäiten Impfprogramm agefouert, fir d’Bevëlkerung géint eng Rei vu Viren a Bakterien ze schützen. An der Realitéit hunn d’Impfstoffer sech als effikass erwisen. Bis haut gëllen d’Pouken als ausgerott, d’Kinderlämung ass a Westeuropa verschwonnen an aner schwéier Krankheeten ewéi d’Diphtherie, den Tetanus oder de Mumps kommen zu Lëtzebuerg souzesoe guer net méi vir.