Gesondheet
Präventioun
A wa mir géife léieren, wéi mir méi bewosst mat eisem Stress ëmginn, an déi éischt Unzeechen erkennen, datt en amgaang ass, sech dauerhaft ze installéieren? Well och wann e bësse Stress zum Liewe gehéiert, féiert e Stress, deen iwwer méi e laangen Zäitraum undauert oder souguer permanent present ass, dacks zu Erschëpfung.
Iwwer den Auteur
Dësen Artikel gouf vum Dr. Eric Mertens geschriwwen, Generaldirekter vun DSB Communication an Editeur vum Magazin SEMPER Luxembourg™ a Letz be healthy™, a Kooperatioun mat DKV Luxembourg.
Säi Stress geréieren, heescht virun allem, déi éischt Zeeche vun enger Iwwerlaaschtung vun eisem Kierper erkennen
De positive Stress kenne mir alleguer. D’Erausfuerderungen, déi een undreiwen. Dat ass dee Stress, deen eis hëlleft, en Examen ze packen, e Projet duerchzezéien oder eng nei Etapp an eisem Liewen unzegoen.
Et ass deen „Adrenalinstouss”, am eigentleche wéi och am iwwerdroene Sënn, deen eis physesch a mental Opmierksamkeet a Leeschtungsfäegkeet steigert.
Genee wéi bei Sportler nom Effort oder bei Kënschtler no der Virstellung ass et fir eis alleguer wichteg, den Drock erauszehuelen, fir net an d’Erschëpfungsspiral ze geroden.
Säi Stress geréieren, heescht deemno virun allem, sech vun den Ursaache vun der Spannung ze léisen, egal ob se familiär oder berufflech bedéngt sinn.
Mat Frënn erausgoe kënnen, raschten, seng Kanner engem aneren uvertrauen, fir sech Zäit fir sech selwer ze huelen a sech mam Partner auszetauschen, all dat sinn nëmmen e puer Beispiller.
E puer Tipps, fir besser mat Stress ëmzegoen, soubal déi éischt Unzeechen opdauchen
- Huelt Äre Liewensstil ënner d’Lupp: gesond Ernärung, reegelméisseg kierperlech Beweegung, e virsiichtegen Ëmgang mat Opputschmëttele wéi Kaffi oder Alkohol spillen eng wichteg Roll. Net nëmmen, fir de Stress ze bekämpfen.
- Entspaant Iech: Fir déi eng ass dat Meditatioun oder déift Duerchootmen, fir déi aner Yoga oder eng kënschtleresch Aktivitéit.
- Huelt Iech Zäit fir Iech selwer, deconnectéiert Iech vun den omnipresente Bildschiermer a leet all Dag e puer Pausen an.
- Op der Aarbecht wéi och am Privatliewen, léiert Grenzen zéien, schwätzt mat enger Persoun, där Dir vertraut oder haalt Är Gedanken op Pabeier fest.
- Setzt Iech einfach a realistesch Ziler an notéiert all Dag dräi positiv Punkten.
- A wann de Stress undauert oder d’Symptomer méi schlëmm ginn, zéckt net, mat engem Dokter oder Fachleit aus dem Gesondheetswiesen doriwwer ze schwätzen.
Vum Burn-in zum Burn-out
De Burn-in bezeechent déi éischt Phas vun der berufflecher Erschëpfung. Wéinst dem chronesche Stress zaapt ee seng Energiereserven un, ouni sech jee ze erhuelen. Et ass een zwar op der Aarbecht present, awer erschëpft, an dofir manner produktiv. Heiansdo schwätzt ee vu Presentismus, fir deen Zoustand ze beschreiwen, wou een op der Aarbecht present ass, obwuel de Gesondheetszoustand engem net erlaabt, komplett produktiv ze sinn.
De Burn-out (och berufflechen Erschëpfungssyndrom genannt) bezeechent déi lescht Etapp, zu där et komme kann, wann een an der Burn-in-Phas näischt ënnerhëlt. Et handelt sech ëm eng déif, total Erschëpfung, déi obligatoresch zu enger Krankschreiwung féiert, mat Symptomer, déi enger staarker Depressioun gläichen, an a verschiddene Fäll eng Hospitalisatioun justifiéiert.
Wéi gesinn d’Warnsignaler aus?
Säi Stress geréieren, dat heescht och, op säi Kierper a säi Geescht lauschteren, fir déi éischt Unzeeche vun Iwwerlaaschtung ze erkennen, wann de Stress unhält: Middegkeet, Schlofstéierungen, Reizbarkeet, Vergiesslechkeet an heiansdo eng gewëssen Demotivatioun.
All dat sinn effektiv Unzeeche fir e Burn-in, deen, wann een net oppasst, e reelle Risiko ass, fir an „d’Krankheet vum Joerhonnert”, de Burn-out, ofzerëtschen.
Allgemeng gëtt gesot, datt de Burn-in dann ufänkt, wann een zanter mindestens engem Mount an engem Zoustand vun Iwwerlaaschtung ass. Wéi bei enger Batterie, déi lues a lues eidel gëtt, ouni sech nees opzelueden, erlaabt eisen Organismus eis, dat auszehalen, mee eis Reserven un Neurotransmitter a Stressresistenzhormonen (Dopamin, Cortisol) ginn opgebraucht, an dann tauche verschidde Warnsignaler op:
kierperlech (Middegkeet, Schlofproblemer, Kappwéi, Schwindel, u Gewiicht bäihuelen, ofhuelen, ...);
emotional (Hyperempfindlechkeet, Reizbarkeet, Angschtgefiller, ...);
a Bezuch op d’Motivatioun (Verloscht vu Selbstvertrauen, Motivatiounsverloscht);
kognitiv (Gediechtnes- a Konzentratiounsschwieregkeeten, Gefill, en eidele Kapp ze hunn, ...)
Burn-out: Preventioun ass besser wéi Heelen
Allgemeng geet een dovunner aus, datt no 6 Méint Iwwerlaaschtung de Risiko, fir an e „Burn-out” ze rëtschen, héich ass.
D’Symptomer sinn déi selwecht, mee vill méi intensiv: Aus der Middegkeet gëtt eng total Erschëpfung, d’Angschtgefiller kënne sech zu enger schwéierer Depressioun entwéckelen, d’Motivatioun ass um Nullpunkt an och d’Effikassitéit vum Patient läit bei null.
Heiansdo schwätzt een och vun engem „allostateschen Zesummebroch”, fir dee Moment ze beschreiwen, wou eise Kierper an eise Geescht virun den Aggressioune vum Alldag kapituléieren.
Niewent dem Impakt op deen Eenzele sinn déi wirtschaftlech Käschte vun der berufflecher Erschëpfung immens héich. Zu Lëtzebuerg geet aus dem Quality of Work Index 2024 vun der Chambre des salariés (CSL) an der Uni Lëtzebuerg eng beonrouegend Feststellung ervir, nämlech datt 51% vun de befrote Salariéen en erhéichten oder héije psychesche Leidensdrock opweisen.
E Burn-out huet villfälteg Konsequenzen an d’Folge si ganz eescht
Ervirgehuewen huet d’CSL ënner anerem d’Secteure vun der Horeca, dem Handel, dem Bau, der Gesondheet oder och nach Salariéë mat atypesche Schaffzäiten. An deenen am stäerkste betraffene Secteure kann ee souguer vun enger Noutsituatioun schwätzen, mat enger héijer Unzuel u Salariéen an enger Situatioun vu Burn-out, aarbechtsbedéngten Depressiounen a schwéiere Schlofstéierungen.
Mir alleguer kennen Aarbechtskolleegen oder Frënn, déi ënner engem richtege Burn-out gelidden hunn, a mir wëssen, datt d’Follge ganz eescht kënne sinn: Méint oder souguer Joren, fir aus der Situatioun erauszekommen, awer och heiansdo bleiwend kognitiv Stéierungen, déi sou schlëmm sinn, datt eng Persoun vu 6 net méi aarbechtsfäeg ass.
Aus all dëse Grënn ass et immens wichteg, scho bei deenen éischte Warnsignaler opzepassen an anzegräifen.
Dir wëllt Iech nees méi beweegen?
Dat ass eng exzellent Iddi! Sicht Iech eng sportlech Aktivitéit, déi Iech Spaass mécht.
Profitéiert vun Offeren no bei Ärer Aarbechtsplaz oder bei Iech doheem. Zu Lëtzebuerg feelt et net u Méiglechkeeten, mat Initiative wéi dem Programm „Sports pour tous” vun der Stad Lëtzebuerg (Turnen, Fitness, Waassersport, Ekippesportaarten asw.) oder deene vu Gemenge wéi Esch-Uelzecht (Multisport, Handiski asw.), ouni d’Sportméiglechkeeten am Fräien (Wanderen, Vëlo) oder an der Hal (Tennis, Danzen) ze vergiessen, déi iwwerall, fir all Alter an op allen Niveauen ugebuede ginn.
D'Gesondheetsversécherunge vun DKV Luxembourg
Entdecken